Prepare sitiyasyon ou nan zafè lajan anvan ou achte kay

Achte kay se rèv anpil fanmi, men ou gen dwa pa konnen ki kote pou w kòmanse oswa kilè ou pare. Men kèk etap pou w suiv pou pran chimen vin yon mèt kay. W ap jwenn yon eksplikasyon pi konplè, nan lang anglè, nan gid Achte Kay nou an.

Pretè yo deside si ou gen kapasite remèt lajan an anvan yo ofri ou yon prè pou achte kay. Yo ka gade faktè tankou kantite lajan ou touche, byen ou genyen, sitiyasyon ou nan zafè travay, ekonomi ou, ak peman ou fè chak mwa sou dèt ou. Yo gade rapò sou kredi ak nòt kredi ou tou, pou wè si ou peye dèt ou yo alè.

Men rezon ki fè yon kont labank enpòtan pou jere lajan ou (nan lang anglè)

Men rezon ki fè antesedan ou nan zafè kredi enpòtan ak kijan pou w amelyore li (nan lang anglè)

Ou dwe konnen konbyen ou depanse kounye a, pou w ka deside konbyen ou ka peye chak mwa pou yon nouvo kay. Fè yon lis ki montre tout bagay ou depanse lajan sou yo pandan mwa a. Konpare depans pa mwa ou avèk salè ou pote lakay ou chak mwa.

Epitou, deside konbyen ou vle mete sou kote chak mwa nan ekonomi, pou ijans ak pou lòt objektif.

Lè ou fin konpare salè ou ak depans ou, gade konbyen ou ka depanse nan peman total pou kay ou a. Lajan moun peye regilyèman lè yo se mèt kay ka gen ladan l:

Peman kapital ak enterè sou yon prè pou achte kay
Asirans sou prè pou achte kay la
Taks sou pwopriyete
Asirans mèt kay
Asirans konplemantè, tankou asirans kont inondasyon
Frè asosyasyon mèt kay (HOA)
Antretyen ak reparasyon kay la
Sèvis piblik

Gen depans, tankou taks ak aisrans, ki ka monte avèk letan.

Akont ou a ap chanje kantite w ap peye, ak kilè.

Pou peye yon pi gwo akont w ap bezwen plis lajan kach nan kòmansman, men peman pa mwa yo ap pi ba epi prè w la ap koute mwens globalman. W ap prete mwnes lajan, donk w ap gen mwens pou remèt. W ap peye mwens enterè tou paske w ap peye enterè sou yon balans prè ki pi piti. Epi si akont ou a omwen 20% pri kay la, ou nòmalman p ap peye pou asirans sou prè pou achte kay (nan lang anglè). Sa fè ou ekonomize lajan, sitou pandan premye ane yo pandan prè pou achte kay la.

Pakont, yon pi gwo akont ka vle di ou gen mwens lajan pou depanse. Ou gen dwa bezwen kach nan finisman pwosesis prè a, paregzanp pou peye frè kloti. Epi ou gen dwa bezwen peye pou w bwote antre nan nouvo kay la, pou amelyorasyon ak reparasyon w ap fè, ak pou achte bagay nèf pou santi ou alèz lakay ou.

Gen opsyon akont ba ki disponib

Gen anpil pwogram ki ka ede ou achte yon kay avèk yon ti akont oswa san akont ditou. Opsyon akont ba yo ka vle di plis depans pandan dire prè a. Lè w ap rankontre avèk pretè yo, poze kesyon epi mande wè plizyè òf prè.

Akont ou a se yon pati sèlman nan sa w ap peye davans la

Lè w ap siyen dokiman yo pou nouvo kay ou a, ou dwe peye frè ak lòt depans pou jwenn prè pou achte kay la. Yo rele yo frè kloti. Nòmalman, frè kloti yo varye ant 2% ak 5% pri acha kay la (akont ou a pa konte ladan). Men, frè kloti toutbon ou yo ap depann de pri kay la, de akont ou a, de frè pretè yo, de kalite prè a, de kalite kay la, ak de kote kay la ye.

Jwenn èd pou achte premye kay ou

Gen anpil eta ak òganizasyon rejyonal ki ofri pwogram ki ede moun k ap achte kay pou premye fwa avèk akont oswa avèk frè kloti yo. Pou jwenn pwogram toupre w la:

Chèche yon konseye nan zafè lojman nan zòn ou an (nan lang anglè)
Rele nimewo èd HOPE™ la nan (888) 995-HOPE (4673), 24 sou 24, 7 jou sou 7

Epitou ou ka mande yon konseye nan zafè lojman pou li ede ou:

Deside ki lè ki bon pou w achte kay la oswa kijan ou ka amelyore kredi ou (nan lang anglè) pou resevwa yon pi bon òf
Byen gade opsyon ou genyen yo pou prè pou achte kay la, oswa lòt opsyon w ap genyen si antesedan ou nan zafè kredi amelyore
Gade rapò sou kredi ou yo, konbyen ou touche, ak lòt enfòmasyon sou zafè lajan epi eksplike ou kijan pretè lajan pou achte kay yo ap evalye aplikasyon w lan

Jwenn pwoblèm ki gen dwa bare wout ou

Diskriminasyon se yon bagay ki ilegal

Pretè yo pa ka ni refize ba ou kredi, ni mande ou peman oswa to enterè ki pi wo, ni ofri ou kondisyon defavorab, ni dekouraje ou aplike pou yon prè poutèt:

Ras ou
Koulè ou
Relijyon ou
Orijin nasyonal ou
Sèks ou (sa gen ladan oryantasyon seksyèl ou ak idantite seksyèl ou)
Sitiyasyon matrimonyal ou
Laj ou
W ap resevwa lajan nan men èd piblik
W ap egzèse dwa ou an bònfwa selon Lwa sou Pwoteksyon Kredi Konsomatè a

Si ou gen pwoblèm avèk yon prè pou achte kay, ou ka depoze yon plent sou entènèt oswa rele (855) 411-CFPB (2372).

“Kontra vant imobilye” ka bay pwoblèm

Yon kontra vant imobilye (yo rele li tou pafwa “vant avèk rezèv pwopriyete” oswa “acha avèk fòfè”) se yon acha kay ki fèt sou plan vèsman olye de yon prè pou achte kay tradisyonèl. Olye pou w al jwenn separeman yon pretè lajan pou achte kay pou jwenn prè pou peye vandè a pri total pwopriyete a, ou dakò pou w peye vandè a pa vèsman chak mwa. Vandè a ap kenbe papye pwopriyete a jiskaske kontra a fin respekte nèt. Papye pwopriyete a reprezante moun ki se mèt legal kay la.

Pou w ka konprann dwa ou genyen nan yon kontra vant imobilye, se yon bon lide pou w pale ak yon avoka. Men ti konsèy pou jwenn yon avoka nan eta w la.

Selon yon kontra vant imobilye, ou dwe aji kòm mèt pwopriyete a pandan dire kontra a, menm si papye pwopriyete a poko pou ou. Nan yon kontra vant imobilye nòmal, ou peye taks sou pwopriyete, asirans, reparasyon, ak antretyen.

Avèk yon prè pou achte kay tradisyonèl, si ou vin an reta nan peman ou yo, pretè a jeneralman oblije tann anvan pou li kòmanse pwosesis sezi kay la. Avèk yon kontra vant imobilye, vandè a souvan kòmanse pwosesis degèpisman an touswit. Degèspisman a ka fèt rapidman si ou:

Manke yon peman mansyèl
Pa ka fè yon “dènye vèsman pi wo” ki se yon gwo montan, si kontra a egzije li
Pa peye lòt depans ki detaye nan kontra a, tankou taks ak antretyen

Epitou, vandè a nòmalman ka kenbe tout lajan ak travay ou te mete pou achte kay la.

Menmsi ou fè tout peman kontra a egzije yo, ou gen dwa tonbe nan pwoblèm. Vandè a gen dwa pa gen tit klè a kay la. Paregzanp, vandè a gen dwa dwe lajan sou yon dwa oswa sou yon prè sou pwopriyete a. Oswa vandè a pafwa senpleman refize remèt papye pwopriyete a. Pafwa vandè a pran lajan ou pou taks ak asirans men li pa peye yo toutbon, donk lè ou finalman vin mèt kay la w ap fè fas a gwo bòdwo, penalite, ak lòt pwoblèm.

Si ou gen pwoblèm avèk yon kontra vant imobilye, ou ka depoze yon plent sou entènèt oswa rele (855) 411-CFPB (2372).